Verbéu, l’Asociación de Traductores Profesionales n’Asturianu, trabayó nos procesos de sotituláu, asesoramientu llingüísticu y espardimientu, dientro del so compromisu cola dignificación de la traducción profesional al asturianu. D’ente los miembros de l’asociación, Carmen Menéndez foi la encargada d’iguar la traducción pal sotituláu al asturianu, mientres qu’Aida Celemín, Dani Menéndez y Aymara González fueron los responsables del trabayu de revisión, llabor qu’Ana López compaxinó tamién cola xestión del proyectu.
Esta iniciativa, que quier tener continuidá, busca visibilizar la producción audiovisual n’asturianu y normalizar la so presencia n’espacios de cultura estables. El ciclu va tar presentáu’l llunes 30 de xunu, na primer sesión de les cuatro programaes, por dellos miembros de Verbéu.
El preciu de les entraes va ser de 3,50 €, siguiendo col oxetivu de facilitar l’accesu a películes de calidá y de puxar por nueves formes de venceyar el cine a la cultura asturiana. Les películes que se van proyectar son les qu’apaecen darréu:
● Llunes 30 de xunu, 19:45 – All We Imagine as Night
En Mumbai, la rutina de la enfermera Prabha vese alteriada cuando recibe un regalu inesperáu del home, que trabaya n’Alemaña. La compañera de pisu, Anu, más moza, intenta en baldre alcontrar na ciudá un sitiu pa poder trebeyar col mozu. Al final, un viaxe a una ciudá con costa permíte-yos atopar un espaciu pa que los deseos de les dos se manifiesten.
● Llunes 7 de xunetu, 19:45 – Fallen Leaves
Ansa ta soltera y vive en Helsinki. Trabaya con un contratu de cero hores nel supermercáu, reponiendo los estantes, pa dempués clasificar el plásticu reciclable. Una nueche conoz de casualidá a Holappa, un trabayador igual de solu, pero alcohólicu. Magar lo esperable y tolos malentendíos, intenten construir una rellación. Como resultáu, Holappa consigue controlar l’adicción que tien al alcohol.
● Llunes 14 de xunetu, 19:45 – En fanfare
Thibaut ye un director d’orquesta de renome internacional que viaxa pel mundu. Al enterase de que ye adoptáu, descubre que tien un hermanu, Jimmy, un emplegáu d’un comedor d’escuela que toca’l trombón nuna banda de música nel norte de Francia. Paez que nun tienen nada en común, quitando l’amor pola música. Al conocer les habilidaes musicales esceicionales que tien l’hermanu, Thibaut propónse cambiar el rumbu inxustu del destín. Ye entós cuando Jimmy entama a suañar con otra vida…
● Llunes 21 de xunetu, 19:45 – The Substance
‘Tu, pero meyor en tolos sentíos'. Esta ye la promesa, un productu revolucionariu basáu na división celular, que crea un alter ego más mozu, más guapu, más perfectu. Tentada pola oportunidá, Elisabeth Sparkle, una celebridá en decadencia, toma esti sueru del mercáu negru faciendo una versión remocicada de sí mesma, Sue, con efectos tan inesperaos como espantosos.
